I RUI ZEL DAWN EM?

( He thu hi ka thianpa Thu leh hla lama miriltak mai, Mama Hmar ziah kan lakchhuah anihhi..)
Aw thalai, i rui zel dawn maw? Han dawn chiang deuh teh, i tellovin engtin nge khawtlang a mawi theih ang? Min ruih san daihte chuan engtin nge kan him theih tehlul ang? Venghimtu tur berin min ruihsan daihte chuan engtin nge him se min tih? Heti hian han ngaihtuah ve teh: Pathianin mihring a siamte hi midangte nena cheng ho tur leh mamawh inphuhrutawn theuh tura a siamte kan ni. Chu chuan khawtlang a siam a, chu khawtlanga kan chenho dan chu ‘khawtlang nun’ kan tih chu a ni. Chu khawtlanga kan tel ve avang chuan mawhphurhna kan nei nghal sa a; ‘kan chenna veng vawn hima siamthat’ chu. Khawtlang himna chu ‘kei’ tel lovin tunge thawk ta ang? Kan that lai hun hi a rei silova, phur taka hna kan thawh theih hun chhung hi a rei lo asin….kan rui zel dawn em?

Thalaite kan mawi chuan khawtlang a mawi anga. Kan khawloh chuan khawtlang a mawilo ve nghal a dawn asin. Experienced ngah deuh Upa lamte kutah ‘siamthat hna’ i dah em ni? An ni chu an vanglai liam tawhin an tha a thum zo tawh si a. Vanglai hun hmang mekte hian kan hun hman dan hi a chhia nge a tha tih kan chian a ngai a sin, kan vanglai hun chu a liam anga, kan hmang nawn tawh ngai hek lovang….I la rui zel dawn em?

Excise Deptt.in ruihhlo avanga thi zat a chhutnaah a tam zawk chu thalaite an ni tihte hi i lo hre ve tawh em? Thalaite kan thih zel chuan tar ngawt chuan kum tam an daih zo dawn hauh lo a nia, kan la rui zel dawn em?

Kan duh huna sim mai thei nia kan inngaih lai hian kan chhiat pui der thung si a. Sebo hnua se kawngkhar ang maia chhiatpui tawh hnu siam that leh chu a sawng-saw-hlawt loh zia hretu i nih ve tho ka ring. I la rui zel dawn em?

Khawtlang nun siam that hi thil awl-ai lo tak a nih rualin Mizo nula tlangval rinawmna leh tlawmngaihna a khat Krista thisena hrinte hian kan thei a sin. I thei ve dawn lawm ni? Krista sipai huaisen ni si, ruihhloin a tukdal mai mai che i in phal dawn em ni? I la rui zel dawn em?

Kan khawvel hi thalaite khawvel a ni a, thalaite hawi lam lam chu khawvel hawi lam a ni ta. I hawi lam lam chu i chenna hmun future a ni asin, i la rui zel dawn em?

Kan thil tih reng reng hi kan tih lai ai chuan a hnuah a lo langfiah a, a thatna leh that lohna pawh hi a lo lang chiang zawk thin. Tuna kan hun hman mekte pawh hi kan hmuh chian theih hunah meuh chuan kan vanglai hun chu a liam tawh ang a, hman that leh chak em em mah ila kan hmang nawn leh tawh ngai lovang. Eng ang duhthusam pawh nei mah la, a tak ram chu a lang ngai tawh dawn si lo, hun tha i la neih lai hian i rui zel dawn em?

- Mama Hmar