KA HMANLAI VE CHUAN (Part-II)

Part I ti lang tawh bawk a,Part II pawh hi ti lang leh law law ang aw,,,,hmundang ah erawh ziaktupa Matluanga Fanai thu lo chuan chhuahchhawn loh ni se...

Thlarau Thianghlim hnathawh lam

Lam nun: Nia, kan naupan lai kha Zoram pum huap HARHNA thlen lai a ni a. Chu hun ropui tak mai tawng tura ka hringnun Khuanun min lo her rem sak avang khan ka thlarau chu Lalpa chungah a lawm ta em em a! A mimir kha kan kan lam suau suauva. Nula rual U deuh tawh, inleng nei rual te’n ‘E khai’ tia auvin Lalpa ropui nan a hnung back zawngin an bu zek zek mai. Mipa, a bikin pa valai deuh leh tlangval hote nek chhuah tumin an Disco khum cher cher mai thin kha a nia. A ni, naupang zawng zawngte kha thlarauva khat tlatin, in khawm turte hian dar rik hma hmain tlar hmasa ber dawttu lamtual hnaih lam sirah kut-tin kan seh nauh nauh tawh thin. Hmeichhe inkhawm zanah pawh attendance kha chu exellent a ni ringawt. Kar khatah hian inkhawm zan hi zan riat leh chawhma awmse kan ti thin teh a sin. Ni, Lam kha a nuam em a lawm. Mahse maw, thiante zinga a huai deuh berin lam hmasa ber nihna a chanloh avanga a thinthawk leh tur kan veng thawng lutuk thin kha chuan Thlarau Thianghlim kha a ti zalen lo deuh fo thin. Tin, mikhual nula hnung chiaha tlazep that thei tura hisap ran ranin, mikhual nulai’n pulpit zawn a thlen chiahah lamtual pana ar-pui-mitmen diar diar lai tak maia ka rilru ang pu mi ve bawkin min han tlakzeh khalh zauh tum te pawh khan hla lak nawn lohva a dang sak leh thuai thuai kha a nghahhlelhawm thin teh e. Ngaiteh, Biakin thlen veleh kan han tawngtai zawka, uluk lutuk maia lamtual lam panin, T-shape ngata ban phara vei thlek phei hnapin, Khuangpui rem chat chat a laichhuat chhir pheia lamtual pan chungzela Lailen pa ang maia suk phei zauh zauh mai lai taka hla lo tawp, khuang ri han fan ta raih mai thin zet kha zawng kal lam leh haw lam speed chu inthlau tak hi a ni ringawt. Khawchhak film a tel mawiin a nia kan chet ran thin ni! Khaw thenawm tlangval piangthar hlim, kar hnih liamta atanga Councillor lo ni ta lam dan style khan naupang zawng zawng hi kan in tir-a-mei-kai duah duah thin lai te kha a va nuamin a van lunglenthlak si em!

Nun Sermon:
Khatia thlarauva pawlna changa lei mite hriatphak loh nun hlimna a kan khah lai khan Sermon thupui hi rilruah hian an in sul pel zut zut maia, kan khaw kawtthler te chuan min zo mawlh lo. Kil tin leh kawi tin maiah hian Sermon thupui hrang hrang hmangin a rik hian a ri chuah chuah mai. A ngaithlatu kha an tlem zawk hial mai awmin, ngaihthlak tur ber pawh hriat a harsa hial awm e. In chhung dung chen lek lekah hian hman atanga danglam ngailo chanchintha ngei mai chu kan han thar thawh tak tak mai chu, Jeriko kulh te hi kan khawdaiah lo awm nise a chim lovang tih pawh sawi ngam a ni mawlh lo. In khawm loh zanah nise thim-hlim atangin chanchintha rusum kan thlaka, Laltin ung kher khawr, a ung lo lam keh tawh, puanbana bel tup tawh chu khaiin ‘Lei chi in ni e`, ‘Gerep hrui tak tak` tihte ngei mai thupuia hmangin a ngaithlatu awm chhun kan nu leh pa-te ho, “Rul thlahte u” han tih phiar phiar mai chu ngaihthat thlak tak hi a ni ringawt. Khawvar dawn mi mut reh thep thawp laia Luka tlangsang atanga ‘Zan hi a ral lek lek tawha, khua…’ tih thupui hmang ngei maia Jentail ho, kan pi leh pute, lam tha duh vaklo ho ngeng chhun tlang hrawih tura han tim phiar phiar mai kha chuh, a chang ve tan chauh lo chuan hriatthiam chi rual a ni mawlh lo.A tuk sikula kan han sawi khawm leh te chuan thenkhat chuan a hma zanah ringawt khan sermon vawi 13 te zu han thlak a.

Ni e, kan Behlawi rep leh Tam-um eizawh hmaa Pathian kha lokal tak ngial dawn a hriat kha chuan thahnemngaih loh theih zia a ni lova, ‘Ni thimah a chan hma leh thla thisena a chan’ hma ngeia ‘In nula tlangvalte ka thu an hril ang’ tih changchawitu tan chuan thut muan chi a ni mawlh lo. Mahse maw, mak deuh mai chu, tunlai paho piangthar, in hmun lo rama an buai reng tho si ang mi rel reng mai tura nuhovin thlarau thianghlimin an chang nu bat reng tho mai ang hian, khan hun lai pawlna kan chan san hle lai pawh khan inkawihnawk dawnah chuan FET awihloh dan hi pass thar a ngai reng tho nia. Khang lai hun, mahni tapchhak zawla ramthim kan vei ngawih ngawih lai leh mahni khaw ram pel lova martar kan in huam laite kha a va nuamin a va lunglenthlak si em!

Lenthiam rual doral :
Tisa thil lamah lut leh ta ila, Sava veh kha thisenin a thanhnan tlat. Lenthiam sirvate tah leh rumna tur kan dawn mawlh lo. Khawdaia kan vah chhuah nikhua-te hian Sairawkherh kak tur hi kan hual hnem thin a sin. Tlema suih that tur te hi kan hmu hnemin kan thlek awl lo. Tichuan, Sairawkherh thar nen, Ipte-a saihlum rit lawih tham a akin khawdaiah kan han ramchhuak a. Mahse, kal lam aiin hawn lamah ipte a ruakin a zang fe zel. Engemaw changa rual U deuh te’n sava te deuh min rawlruk chang lahin khan chhungte bulah sawi thiam a har thin teh a sin. Nu leh pate bulah chuan ‘A teuh’ leh “A hmul leng chuai’ hi a tam em em zel a, Savate kha kan ti piangsual hnem awm thing ngawt mai. Vanneih thil thuah Mitval rual zinga a tar chakvaklo deuh leh kan Saihlum a intawn fuh hlauh tum chuan, a rang a rang a tlan hawn nal nal in, Saihlum pawh tiah thathumlo, a bawp lehlam saihlumin a thlawhbo lehnghal, chhuat leia han theh thlak thum chhak mai ni te kha. Thei ila, nei ila, ngam ila Siala aih a mawi lo bik lem lo a sin. Tlema lei kan deuh hnuah, a hranpa a chhungte min tirh pawha kan kal ngam lohna tur ramhnuai pik zingah, Thlasik zingkar khawvawh lai tak maia, Tlaizawng buk hnuaia khabe sai hlak hlaka kan thut khurh hlawh hlawk laite leh sava koh nana Saihlum leh Sairawkherh kan khawn rik karh karh laite kha a lo va hreawmin a va lunglenthlak si em!

Sual vawr tawp lamah:
Zan len effect hmasa ber chu khang hun laia naupang sual nihna ber Meizial, sahdah, Khaini ilo vel a in hnamhnawih kha a ni a. Test chhin chak hun lai a ni tlat. Khami zan, ka thianpa’n thingfak 50 a a lei, Scented Khaini, a bura vai biang puar lem chuang ngei mai kan test chhin zan zet kha zawng, tihdanglamin ka awm, mahse thlarau thinghlim chan lai a mi ang chu a ni lo. Luak leh hnaptui a in mixed a, mittuiin an merger lehnghal. Dam khawchhuah zawh pawh in ring lovin, ka tel lova thiante pawnto tur leh sikul kal tur te chu mitthlaah an lang zut zut mai. Hlim san laia sermon thlakzo haw tur nen chuan khami zan ka leng haw tur chu chhim leh hmar ang mai a ni. Tlan koh ang maiin sumhmunah kan tawi khawmuang fe phawta, thih leh thih tiin kawngkhar kan si hawng rawih mai. Hlauh ang ngei ngei in a rim chuan chhungte hnar verh chhovin, thluak fan chho zelin ka lama a rawn chhuak leh kut lam a fan chhuk dan chu Pastor fanu thunun zan ai mahin kan inchhuang khur boruak chu a rip hial awm e. Meizial lah chu engemaw chen statement hmanga tlangsam hnah zuk bansanin, mi meibung changin kan hman hlel a. Paho meibung bulah khan saihlum chhar tur kha zu han awm zel a. Biak in an hnaiha, a meizial bung a sei duh tih hriain Pi Lali inkhawm kal tur chu hlui khat daih hian an rawn chhawm chhuak a. Spy hna thawkin kawng lakah hloh palh awih a ni lo. Biakin bul zunin bulah battalion chanve dawn hian lo nghakin, inkhawm bana zuk leh tur hisapa a liah hlum, Biakin hungna pal bana a tar va mai chu rang mai khengin kan han craise praise (a awmzia ka hre bik law) ta mai thin kha a ni a. Khang lai khan kan lo taima lehling zawkin a va lunglenthlak si em!

Sipai huai:
Rambuai rah chhuah zinga langsar ber pawl chu sipai hlauhna kha a ni awm e. Naupang tap thlemna ber kha a ni a. Tih, Hlauh, thawn leh ngaihsan kan fawm a. Nia, sipai an ni tlat, vai tawng in an la tawng zui bawk si. Kan zawh tawk a tlem awm tehlul nen Sipai puak phurh kha kan hlau em a sin. Pa, Block president neih ai chuan Sipai patrol lo be ding thei pa neih kha a thlanawm fe zawk. Eng anga tap tui lai pawh niin, kan tah chhan kha tha-in nawrhpui tlak khawpa thu tling pawh ni teh reng mah se,”Chu sipai” an tih tawh kha chuan inhnit hlawp hlawp chung pawhin fullstop hram kha tihmakmawh ka chunga lo tla a ni tlat. Hnawksak an ti ru ngawih ngawih tih hre ta lo chuan, an silai mawlh mai kha kan hlauva, naupang tap kap pawp mai duh hmel khan kan hmu tlat a lawm. Sipai di phur, Biri zu paha chawl hahdam mai mai pawh bang awng atangin kan bih dek dek ngam chauhva. An kal liam hnu lahin Vai rim hnim tur in team khat daih awm vel hian kan bawr nghal laih zel kha a ni a. khati taka Sipai kan lo hlau kha a lo va atthlakin a va lunglengthlak si em!

Zan pawnto:
Khai, khang hun nuam leh hlimawm lutuk kha sawi hmaih phal chi rual an ni lo. Infiamna chi hrang hrangin kan infiam a. ‘Sakei bu ka luah, a bu lum lai ka luah ka luah’ tiin chhun enga kan kawm thin kan thiante tho hlau khan baklengin kan tlan chhiaa. A ruata kan ruat Saikalak-misuala ngei mai hlau khan kawng awm chhung zawng kan tlan chhia a, na chang hria ni ila Tipaimuk road ah kan tlan duh hial awm e. Kawngin daih tawh hek suh. Pu Langa kawm karah tlan lutin, Vawkpui no nei hlim bu tak mai kan han tawn darh. Nguk nguk tiin min lo ter thei bik der silo, chhuah leh dawn lahin chuan Saikalaka kan hlau si. Tapchhak zawn kil lamah zawi muangin kan han bawkvak chho, vaivut kara uihlii’n a rang arangin khuangchawi thla emaw tiin kut sa ruai ah min lo hmang zui. Pu Langa fanu Ku Heri inleng hovin thingpui in bangin min rawn Baptis rawl nen. A sat thu sawi ngam a ni lo. Zawimuangin kawmchar lam tawlhpheiin, Pu Langa nupui, Pi Nemi`n a tunu Chemi zun a thlit lai tak mai nangching in min han ordain leh thlap. Hlau chung chunga At-hlo-hling te chu pal phei zelin thingkhawnah kan han lawn liama, Thla lah chuan min rawn melh kuau chungin chhum karah a lut tak zut zuta. Thiante kan han pawh leh meuh chuan lenghawn ar a khuang ta raih mai. ‘Tin dial e’ tia kut insuihzawmin, a tlak tlak vanduai turin vaivut kan la vawr zui. Mahni inlam theuhah tlan hawngin hlauhna bawihin min zem tan. Sumhmun thim paltlang turin sakruangah laitha a zam mawlh lo. Hla de daw atanga “Nu” tiin vawi thum el euh kan au lauh lauh hnu chuan Laltin ung tawh tak, Sermon na a ka lo khai thin ngei mai nen chuan ka Cindy chu a lo chhuak. Thlamuang awm takin a thlawhin kan han thlawk luta. Hmabak ko tak hmachhawn tur a la awm cheu. Ke sil lova mut phalloh tih chu Kumpinu thuchhuak aiin a rorum zawk. Hmanhmawh takin ke hmawr chu a bal cho chhuak tawkin kan han tleuh puat a. Tapchhakah Chhemthei rah chhana tuibur hmuamda awm vel kan in hem hnu chuan ka pawnto na suit nen chuan pawnpui kar ah kan in thawlh lut leh ta nge nge. Kha tiang zan, uihli vanga kei leh ka chhungte erawh in mutmu kan hmuh mang loh laite kha a lo va ngaihawmin a va lunglenthlak si em!

A sen chi te nen:
Heta a sen chi kan tih hi chuan kohhran sadai a thiat lova, VDP mit a ti mim hek lo. Pate ram kalin Theikhuangthlup ( Thei chhungsen kan tih mai) min rawn hawn changa thiante zingah ei bik nih lantir duh avanga hmui-hmai leh kut ilo vel han sen nalh theih dan te kha. A chhip seh hawngin thian duhsak zawng deuhte vawi hnih-khat kan han liah tir zuaia, a hang zual bik a sin aw. Sawhdawnga Theihmu rah hmin han sawha duh tawk maia a sawh-fung kan han in peh zut tawm laih laih maite khan a tuina a ti nep chuanglo mai nilovin kamsirah beng thleng rawka a sen phei ruah mai te khan nun a ti hlim zual thin. Kuhva ei chakawmna ber chu a sen bawk kha a nih avangin U-te in lengin kuhva phel min khilai zauh changte khan chil kha kan chhak zingin a rawng kha a mawi zual thin. Manlo va sen theihdan tha ber chu Fahpawl leh Hnahkiah pil khawr pawlh kha a ni tih kan chian em avangin Bekang-um-hnah te chu khawdaiah te hian kan hual fur thina, a kung rek nguk khawpin kan thel awllo. Nu le pate’n “Rulhut pai a awl” an tih avang erawh chuan duhthusamin a tui chu kan lem ngai lova, kan pik sen zuai zuai thin. Chungte avanga thei ta riauva kan in hriat laite kha a lo va atthlakin a va lunglenthlak si em !

KA HMANLAI VE CHUAN (Part-I)

A thupui atang khi chuan a rei tawh hmel khawp maia, mahse a thu hmasa lama HMAN tih hi hi thluk rei lutuk lovah kan ti mai a ni ang chu. Ka lung ti leng thintu leh tun thlenga ka la mangphan thin chu ka naupan lai, kan khua a ka awm lai kha a nih ve tlat thin avangin ka tan chuan khang hun bak kha HMANLAI dang ka nei chuang si lo. Kan in hrethiam a ni ang chu.

Chingal, ZRM Jeep leh Handyman:
Nia khang hun lai te kha chuan Congrete building neih leh IAS officer nih te kha chu kan rilru ah hian a lang pha lo hrim hrim. Thingphel chhuat neiha, tuichawi nan Tuium thar lam bakah Baltin nei nih kha chuan hlimawm tak a ni. Zirtawp ni, zirtirtuten inbualfai tur an tih nia, sikul banah tuikhur lam kan pan laia, fianthlira chingal fir kan ken vau vau lai, thianten Saikhup no puana kawngvawn phaha Chhangphut sahbon leh Sahbon sen belhbawm an ken bik ni a kan rualawh zia te kha. Inbual hma leh zawh hnua tuikhur kianga Daidep tawng/vawm ringawta kan khawtlai nite kha aw…Kan khuaah Buhfai phur Jeep ZRM ngei mai lo luh ni te khan, cham hlen tura duh ngawih ngawih vang pawh nilo khan kan um nasa thin a sin. A han ding khawmuang deuh te kha chu kan hlam nasa thinin, a Bracket kua te chu kan Telephone changkang ber a ni thin a. A khu chhuahna kua te chu kan zen tle hlarh lo chauh kha a ni a. Engemaw changa Jonga lo lut te phei kha chu, a liam turte hi a lan theih chhung kha kan Tlumtea thlir tak vawng vawng a. My Aim in Life chu DRIVER tih sawi lova lantirna turin Saihlum leh Thing in Motor lem kan siam a, ko pangah kawng siam chawpin hmui vung bur khan kan VU nileng hlerh hlerh mai thin kha a ni a. Pa nei themthiam deuh te Motor Condition kha a tha a ni mai. Siam thiam ta lo chu rual U-te Tawlailir chu thing kak nen kan handyman a, kawng zawl ah kan nawra, kawng chhova kan put saka. Vawkhriak (a ke tih nal na tur) khaini bur khatin vawikhatte chu kan HIRE ve zauh chang te chu a awm. Mahse kan chuan thui poh leh kan put chhohna kawng a thui a ni mai. Perek kang bung zawng reng reng inkan nileng a, Tawlailir ke tura Fartuah leh Vang zawng reng renga kan rammut thin lai te kha…. A lo va hahthlakin a va lunglenthlak si em!

Nute hmanrua nen:
Lehkhachaih siam thiam ve ta lochu rual U-te ta bawk vawn/thlah sak turin nitla van vuaiin kan in volunteer a. A len san deuh laia Tuibur hmuamda vel, a neitute zunram thiar lai lo vawn ve chu kan allowance sang ber chu a ni tawp mai si thin. Han siam thiam ve hnu lah chuan nute khawihnun dah that lang lo thei ang berin kan sik thla a, a nih loh leh buh mal/chaw malin kan char khir bur maia. Kan la neihin daih thui hek suh , nute second-hand thiatna La-hlum thulkhung chu kan han trick a, hrui fual purin kan hum thlan dup a, kawng daih chhung kan tlan thlan tla phung mai thin. Nute lo hawn hmain la hlum chu a ngai ang chiaha dah leh hman a tul si. Lehkhachaih chhuakin, la a chhuah pui tuma zanriah ei hun a nghahhlelhawm loh thin zia te kha a lo va lungngaih thlakin a va lunglen thlak si em!

Kawtchhuah lamah:
Nute losul haw hma tual laiah kan in kawihnawk dawn. Khaile, pawl siam dawn atangin pawl duh bik nei ranin thum kan vawr/inthah a. A fair lo tan nghal. Thiante kawi ti keh nan Suan them leh thirbel chhutsawm chu kawi chhungah kan thun . Kawi-thir-thun hman awihlohna Bill pass thut changa, a ruka hmangin kan kawi duh ber mai an han nauh keh darh chuai nia, kawi dang nei tawh silo duh aia hmaa ban a tul chang te tak kha... Chu, Losul an lo haw tan ta, ka chunnu, kei atan Cindy Crow Ford ai pawh thlanawm zawk hmuak turin bak lengin kawt chhuak lungdawh lam ah ka lim phei, naupang zawng zawng mahni super hero theuhte hmuak turin kan tlankhawm. Mi nute zawng zawng hawn hnuah ka Mother teresa-i a lo lang veta. A EM karah fanghma leh Vaimin a in zeh tat ni kha chuan a hnam hrui kha in thlengin `thlah lovin ka vuan tlat zel ang a`tih hla kha a paractical-in ka hmanga. A hnungah ka pa ngei mai khan Thinglukham pu chungin a iptepui zen turin mintih nia. Khai, kawi kawm tha mi leh kawi kheh sa lo awm ruih mai ka dap fuh ni te kha chuan, ka pa leh tunlai Undertaker hi in beidawn mahse ka pa lamah ka neih zawng zawng ka thap ngamloh tak ah Berul chuk leh Sar zuk ei a ni mai. Kurt Russel te lek lek ka pa Chempui a ni mai. Maian bai (la bai loh zawka nia) leh ram chaw an rawn hawn te chu Ngal tha chakna ka pan a tih avangin kan ham tak bawrh bawrh a, chaw eikhamah kan chhuat dungah kan tlan chhin, ka Unau, ka rinna ka chak pui a ni ta ve ang, ka chak sawt tak tak a sin. A chhan chu maw ka pa`n “I chak sawt” min ti miau hek.
Ka nu Dawnfawh te kha ei loh tura chin, thar leh hawn a ni ta emaw tih hial tura ka roh laite kha, a lo va nuamin a va lunglenthlaksi em !

Mas a va nuam em!
MAS dawn tak te kha aw. Chhungte zin haw tur neih kha chuan tuktin mai hian tlailama chhungte zin ho hmuak turin kan inpuahchaha, nitla van vuaia hmuah hnuah ral hla takah tute emaw an rawn lang vau vau mai. Phur lutukin kawr thar leh engengemaw mithla chungin an lam panin kan tlan. Mahse e, “I chhungte an tel ve lo”, an tih ni kha chuan a van hrilhhai thlak teh lul em! Beidawn tawh lamah Mas dawn ni tepa an rawn tel hlauh lahin tel ta lo chhungte hrilhhai dan ngaihtuah miah lovin hlim sa lohvin kan sa-haw a.
Tin,zin haw awmna inlamah chuan naupang zawng zawng hi Chithlum leh engilo beisei in kan Conference mup mup mai thin kha a ni a. Chhungte zin haw in Sairawkherh fan tur leh Ball pui case, puanchhia leh lehkha a hnawhpuar tur min rawn hawn hlauh kha chuan thiante khan min hmu babu thin teh e. A petna tur puan pheikhawk sen, achhipa thelret awm min hawn tum phei chuan, a tuk khua kha a var har thin ngawt mai. A ni reng a, kan bun rim si, thlasik runpui thlen hma in pheikhawk dinglam ke zungpui zawnah chuan ventilation a in hawng va tawha. Mawza tel ta lo chu pheikhawk bunna chin chunglamah chuan Ar hmul a thiah theih mai awm mange tih tur hian a chat khing tlat thin. Mas tuka Levenday(?) kawrthar hak a balloon bial chi leh sei chi neih phei kha chuan a aia Mas hi a awm leh tawh chuang lo. Mas ruaitheh dawnah Tlangsam buk ah nunna thap tak meuh meuhva kan chenpui avangin levenday kawr thar pawh chu a san/sam leh ta mai si. A van pawiin a van inthlahrun thlak em ! Kawr thar kan neih leh hun tur chu naupang khawmpui chiah kha nghahfak awmchhun a ni ta. Chutih hunah chuan Mas kawr chuan kilh a nei tawh lovanga, a hma suihna a zum sei put tawh mai dawn si. Engemaw tahna tih hriat rengin a khak bur tawh mai bawk anga. Mas tih lohvah chuan he KHAWMPUI hi a ni kan Valentine`s Day ve chhun chu.
A ni, chutih hunah chuan khawmpui turin, zan riak ngei turin, mahni zawhtawk nen hotu/zirtirtu te chhawmdawl beisei ranin kan in ak chhuak ve a. Khawmpuia pakhatna niha kawr thar neihbawk te kha, a lo va nuamin a va lunglenthlak si em!

Sikul lamah ve thung:
Sikulah nise, NLUP leh MIP sem dawn vang pawh ni chuang lo khan kan thleng hma thei a sin. Tan hmain hah hnepin kan infiam hman zan phawta. Thian thenkhatin Tuithak, mahni ina engamaha kan ngaihloh, an lo ken te kha chuan engamah hmain kan han pak tan a. Piniciline bur chhinte khat kha lehkhapuan phek khatin kan han thlenga. A neitu lah-in a duh hun hunah a liak duai duai reng tih hre reng mah ila a hang hlei hlei khan kan hre tlat tawh. Puar peng pawng in chi thak kan liak si hlep hlep mai thin. Thianho kha chuan Sawhthing ro zai lep leh sunhlu sawng tawh pawh kha a tui em em zel mai tawh si.
Chawlhlawk laiin pawnchhe bawlin sikul tual zawlah naupang,mahni pate party martar pui ngam thiau khan, khang hun laia party lar ber ber PC leh Congress team kan han innuai ta mai thin a. “Keini chu Janata kan ni” inti kha chuan neutral takin tan lam an nei nghal bawk a. MPF,(Mizo Peace Forum) a symbola mupui lem an hman avanga Mu-pui Fing kan lo tih tak te khan Janata ho tan loh lam lamah khan rinna leh duhsakna an lo lantir ve mek bawk . Pet goal dawn tep ah Dar an nawn, thiante an tlanlut, goalie awm lova pet goal lah kha mahni bakin kan pawm silo, thlantla phungin kawngka-te ah kan zuang luta, zirtirtu lo lutin min hmu hman chiah. Ka hmabak chu sikul hungna tur thingtuai 10, hlam hniha sei, naktuk sikul tan hmaa neih a ni. Kamding thu chhuak a nih avangin zawm loh theih a ni lo. Pet goal dawn tep, ui lutuk vanga lut khawmuang nih nen in man lo tak a ni. Second half lah chu naktuk chawlhlawk daih a ni tawh si. Chhun chawlhah tlan hlira in thleng thakin, kut sil mang lovin bellam kan kawm ngang nganga, chaw tlang lian tawk kan lek chhuak va mai, lehlamah chinen, sikul lam kan pan leh. Arpui no hruai, a fate tana thahnemngai in min lo Ambush (lambun) a tum, Hlau chung chungin buh-lu- chuh na ve siin Arpui kan pet tak taka. Hnung lam atangin ar dang rawn fly-in ka chaw tlangah tak mai a rawh side kick. Chaw tlang a tla. Uipui in rang mang khengin a ko va tih tur lo tla chu a lo bur pui ve nghal chat. Hna hmasa ber chu ti rawh tih ngai miah lova Uipui lam theihna show chu a ni mai, van neih a siamin a phel chu kan la chang hrama. Vaivut kai lai lai kan nuai fai nawk nawk a,chi lah chu hum tui dup tawh mai si baklengin sikul run ka thleng leh thei hram. Chawlhlawk a inkhelh kha chhunzawm dawnin mi pawl la thleng lo an tam si. Chuvang alawm a tukah Second half khelh a ngaih thin ni. Hawn veleh a thingpu tura liam nghal ngai, rilru kap teuhva thut chawhnu lai te kha, a lo va lungchhiat thlakin a va lunglenthlak si em!.
Premiership aia ropui:
Taka, ka sawi hmaih tep. Kan pian hma boral tawh Tuaitea Memorial Football Tournament, Mas leh kumthar inkara kumtin an lo khelh thin, belpui inchuhin Pu Manga Team leh Pu Hranga team te inkhelh ni te kha. Engmah hmain Pu Manga team kha, a nupui Pi Chemi`n theihai kung a neih len vang leh a changa min pek ve thin avangin kan tan rum rut phawta. Parachute zar hlim lo chin chiah chiahah faisa hlawm keih tan tan chung khan thiante nen a goal hun kan nghak thap mai. Tlangau pa in Sakhi phaw khawr hmangin inkhel tan a hun tih an puang lauh lauhva, Hlingsih rah nen rifiri a lo chhuak, kan tan an chak chuan min tan, chak loh chuan min tan lo deuh tih melhin kan lo melh nghal. Pu Manga team lam, Full back ah Ku Danglova, kawnga kawr suiha, diar tial khimin, kawng dawm meuhva a ding vang mai han hmuh ina min tih thlamuan zia kha !. Mahse Ku Hluma thang-en tur, lehlam pawlin an lo sawm, goal bana chempui sat bura, iptepui banga a tlan lut ve ngawt kha chuan thinphu a ti rang kher mai. Mahse rin ngamloh beisei ruk siin tan lam an chak ta. Tlai lamah parachute zar hnuaiah lawm man sem a lo hun . Team Captain Ku Vana`n Dekchi bel lian tlang mumal nei tawh lo lek va va chungin, “Pi chiau fawr, Tuaitea Football Tournament, Champhai-sip, hip hip hip” an tih lauh lauh hnua „Phurei, Phurei, Phurei” tia khawk rum rum a kan au lai te kha, a lo va hlimawmin a va lunglenthlak si em !

Kawtchhuah lamah bawk:
Tin, heti hi a ni a, enganga laklawh lai pawh nise. Khawdaiah Hlado chham leh Tlangtlir ri kan hriat kha chuan naupang zawng zawng kha kan tlankhawm hum hum a. Hlado ah khan Vawmkhuai e tih emaw Awrvar e tih emaw kan hriat phei kha chuan Savawm tin chan loh hlaukhan kan hman hmawh zual sauh thin. Thlen veleh atangin Savawm tin chu kan duh ber kan han vuan nghal chat a, thlah zeuh kha a thiang tawh lo. Pasaltha in thleng thak in kandawm a. A zung lai tin chang kha chuan a tukah an rawn awrh chhuak lian larh mai thina. A zungte tin chan erawh chuan lawm a kim mawh deuh. Khang hun lai Savawm te khan ke tin 133 vel anlo nei thin lo kha a pawi ngawt thin mai. Pasaltha ten sa ti tha nelh nawlh min hleh hlauh tuma kan rap hnuai kan melh ngun dan em em zia leh, zan lama zawhte leh sazuin corruption an lo beih tuma a tuk zing hrilhhai thlak zia te kha , a lo va pawiin a va lunglenthlak si em !

Hmanlai YMA:
Ngaiteh, YMA Social dawn zan tlai lam atanga kan nghahhlelh thin zia te kha. YMA `C` (YMA Chhang lo ni ta) tualphiat taima hnenah lawman Grammy / Oscar chithlum an sem dawn. He tual phiah hi chawlhni tuk tin kan duty a ni tlat, Hreu leh khawlai tihfaina hmanrua, a neiin Bawng ek paih nana tangkai tak Suahdur leh Bawngtuthlawh te nen Zawlbuk nun kan hmang thin. Hming lamna bu nen thlap, awl ruk theih a nilo. Zanriah eikhama YMA Hall ah a pui a nawiin kan lawi mep mep mai le. Tan a hun ta. Tana hla Kan zotlang ram nuam tih hla ngei mai kan sa dawn. Ku Hlira Second hand tingtang, se-dar tia lawng , hrui thum nei a rawn kuah chhuak. Zai kan tan. Kan khua a Double Bass tum thiam ber Ku Thanga`n er ngang ngangin an tum thum dep dep mai te leh a hnu lama puipun nia awl ngailo khawpa nula zaithiam, kamding te kawmthlang, Ramhai buk nei Chhungpuiin Zanlai thlifim an thlawh mai chu Celine Dion te lek lek, a hun lai kha chuan a dah nil ve chiang khawp mai. Pi Thluaii in riak hovin Bittle Shoe nen rock N Roll dik tak maia Herthuli lai chuat an rawn chhir tak tak mai chuh na chang lo hria se Matallica aia album an hralh hnem loh takah a nimai. YMA`C` Nobel prize ah kei min thlang lovin ka hma chiah a thu, a pa chu sipai bang, Pu Luta, Japan ral len lai kan ngaih thlak na ber, huaisen kan tih theih em em leh Japan nula tam tak pawh khuai khema, tah tir zawih zawih tu, ral hmaa vawi tam tak thi thelha in sawi, suahdur nei Zate-a an thlan tak tum te pawh kha, a lo nuamin a va lunglenthlak em!
(He article hi Matluanga Fanai ziah ani a,ama phalna lak a chhuah ania,midang chhuah chhawng duh ten a phalna lak hmasak angai ang...)