KA HMANLAI VE CHUAN (Part-II)

Part I ti lang tawh bawk a,Part II pawh hi ti lang leh law law ang aw,,,,hmundang ah erawh ziaktupa Matluanga Fanai thu lo chuan chhuahchhawn loh ni se...

Thlarau Thianghlim hnathawh lam

Lam nun: Nia, kan naupan lai kha Zoram pum huap HARHNA thlen lai a ni a. Chu hun ropui tak mai tawng tura ka hringnun Khuanun min lo her rem sak avang khan ka thlarau chu Lalpa chungah a lawm ta em em a! A mimir kha kan kan lam suau suauva. Nula rual U deuh tawh, inleng nei rual te’n ‘E khai’ tia auvin Lalpa ropui nan a hnung back zawngin an bu zek zek mai. Mipa, a bikin pa valai deuh leh tlangval hote nek chhuah tumin an Disco khum cher cher mai thin kha a nia. A ni, naupang zawng zawngte kha thlarauva khat tlatin, in khawm turte hian dar rik hma hmain tlar hmasa ber dawttu lamtual hnaih lam sirah kut-tin kan seh nauh nauh tawh thin. Hmeichhe inkhawm zanah pawh attendance kha chu exellent a ni ringawt. Kar khatah hian inkhawm zan hi zan riat leh chawhma awmse kan ti thin teh a sin. Ni, Lam kha a nuam em a lawm. Mahse maw, thiante zinga a huai deuh berin lam hmasa ber nihna a chanloh avanga a thinthawk leh tur kan veng thawng lutuk thin kha chuan Thlarau Thianghlim kha a ti zalen lo deuh fo thin. Tin, mikhual nula hnung chiaha tlazep that thei tura hisap ran ranin, mikhual nulai’n pulpit zawn a thlen chiahah lamtual pana ar-pui-mitmen diar diar lai tak maia ka rilru ang pu mi ve bawkin min han tlakzeh khalh zauh tum te pawh khan hla lak nawn lohva a dang sak leh thuai thuai kha a nghahhlelhawm thin teh e. Ngaiteh, Biakin thlen veleh kan han tawngtai zawka, uluk lutuk maia lamtual lam panin, T-shape ngata ban phara vei thlek phei hnapin, Khuangpui rem chat chat a laichhuat chhir pheia lamtual pan chungzela Lailen pa ang maia suk phei zauh zauh mai lai taka hla lo tawp, khuang ri han fan ta raih mai thin zet kha zawng kal lam leh haw lam speed chu inthlau tak hi a ni ringawt. Khawchhak film a tel mawiin a nia kan chet ran thin ni! Khaw thenawm tlangval piangthar hlim, kar hnih liamta atanga Councillor lo ni ta lam dan style khan naupang zawng zawng hi kan in tir-a-mei-kai duah duah thin lai te kha a va nuamin a van lunglenthlak si em!

Nun Sermon:
Khatia thlarauva pawlna changa lei mite hriatphak loh nun hlimna a kan khah lai khan Sermon thupui hi rilruah hian an in sul pel zut zut maia, kan khaw kawtthler te chuan min zo mawlh lo. Kil tin leh kawi tin maiah hian Sermon thupui hrang hrang hmangin a rik hian a ri chuah chuah mai. A ngaithlatu kha an tlem zawk hial mai awmin, ngaihthlak tur ber pawh hriat a harsa hial awm e. In chhung dung chen lek lekah hian hman atanga danglam ngailo chanchintha ngei mai chu kan han thar thawh tak tak mai chu, Jeriko kulh te hi kan khawdaiah lo awm nise a chim lovang tih pawh sawi ngam a ni mawlh lo. In khawm loh zanah nise thim-hlim atangin chanchintha rusum kan thlaka, Laltin ung kher khawr, a ung lo lam keh tawh, puanbana bel tup tawh chu khaiin ‘Lei chi in ni e`, ‘Gerep hrui tak tak` tihte ngei mai thupuia hmangin a ngaithlatu awm chhun kan nu leh pa-te ho, “Rul thlahte u” han tih phiar phiar mai chu ngaihthat thlak tak hi a ni ringawt. Khawvar dawn mi mut reh thep thawp laia Luka tlangsang atanga ‘Zan hi a ral lek lek tawha, khua…’ tih thupui hmang ngei maia Jentail ho, kan pi leh pute, lam tha duh vaklo ho ngeng chhun tlang hrawih tura han tim phiar phiar mai kha chuh, a chang ve tan chauh lo chuan hriatthiam chi rual a ni mawlh lo.A tuk sikula kan han sawi khawm leh te chuan thenkhat chuan a hma zanah ringawt khan sermon vawi 13 te zu han thlak a.

Ni e, kan Behlawi rep leh Tam-um eizawh hmaa Pathian kha lokal tak ngial dawn a hriat kha chuan thahnemngaih loh theih zia a ni lova, ‘Ni thimah a chan hma leh thla thisena a chan’ hma ngeia ‘In nula tlangvalte ka thu an hril ang’ tih changchawitu tan chuan thut muan chi a ni mawlh lo. Mahse maw, mak deuh mai chu, tunlai paho piangthar, in hmun lo rama an buai reng tho si ang mi rel reng mai tura nuhovin thlarau thianghlimin an chang nu bat reng tho mai ang hian, khan hun lai pawlna kan chan san hle lai pawh khan inkawihnawk dawnah chuan FET awihloh dan hi pass thar a ngai reng tho nia. Khang lai hun, mahni tapchhak zawla ramthim kan vei ngawih ngawih lai leh mahni khaw ram pel lova martar kan in huam laite kha a va nuamin a va lunglenthlak si em!

Lenthiam rual doral :
Tisa thil lamah lut leh ta ila, Sava veh kha thisenin a thanhnan tlat. Lenthiam sirvate tah leh rumna tur kan dawn mawlh lo. Khawdaia kan vah chhuah nikhua-te hian Sairawkherh kak tur hi kan hual hnem thin a sin. Tlema suih that tur te hi kan hmu hnemin kan thlek awl lo. Tichuan, Sairawkherh thar nen, Ipte-a saihlum rit lawih tham a akin khawdaiah kan han ramchhuak a. Mahse, kal lam aiin hawn lamah ipte a ruakin a zang fe zel. Engemaw changa rual U deuh te’n sava te deuh min rawlruk chang lahin khan chhungte bulah sawi thiam a har thin teh a sin. Nu leh pate bulah chuan ‘A teuh’ leh “A hmul leng chuai’ hi a tam em em zel a, Savate kha kan ti piangsual hnem awm thing ngawt mai. Vanneih thil thuah Mitval rual zinga a tar chakvaklo deuh leh kan Saihlum a intawn fuh hlauh tum chuan, a rang a rang a tlan hawn nal nal in, Saihlum pawh tiah thathumlo, a bawp lehlam saihlumin a thlawhbo lehnghal, chhuat leia han theh thlak thum chhak mai ni te kha. Thei ila, nei ila, ngam ila Siala aih a mawi lo bik lem lo a sin. Tlema lei kan deuh hnuah, a hranpa a chhungte min tirh pawha kan kal ngam lohna tur ramhnuai pik zingah, Thlasik zingkar khawvawh lai tak maia, Tlaizawng buk hnuaia khabe sai hlak hlaka kan thut khurh hlawh hlawk laite leh sava koh nana Saihlum leh Sairawkherh kan khawn rik karh karh laite kha a lo va hreawmin a va lunglenthlak si em!

Sual vawr tawp lamah:
Zan len effect hmasa ber chu khang hun laia naupang sual nihna ber Meizial, sahdah, Khaini ilo vel a in hnamhnawih kha a ni a. Test chhin chak hun lai a ni tlat. Khami zan, ka thianpa’n thingfak 50 a a lei, Scented Khaini, a bura vai biang puar lem chuang ngei mai kan test chhin zan zet kha zawng, tihdanglamin ka awm, mahse thlarau thinghlim chan lai a mi ang chu a ni lo. Luak leh hnaptui a in mixed a, mittuiin an merger lehnghal. Dam khawchhuah zawh pawh in ring lovin, ka tel lova thiante pawnto tur leh sikul kal tur te chu mitthlaah an lang zut zut mai. Hlim san laia sermon thlakzo haw tur nen chuan khami zan ka leng haw tur chu chhim leh hmar ang mai a ni. Tlan koh ang maiin sumhmunah kan tawi khawmuang fe phawta, thih leh thih tiin kawngkhar kan si hawng rawih mai. Hlauh ang ngei ngei in a rim chuan chhungte hnar verh chhovin, thluak fan chho zelin ka lama a rawn chhuak leh kut lam a fan chhuk dan chu Pastor fanu thunun zan ai mahin kan inchhuang khur boruak chu a rip hial awm e. Meizial lah chu engemaw chen statement hmanga tlangsam hnah zuk bansanin, mi meibung changin kan hman hlel a. Paho meibung bulah khan saihlum chhar tur kha zu han awm zel a. Biak in an hnaiha, a meizial bung a sei duh tih hriain Pi Lali inkhawm kal tur chu hlui khat daih hian an rawn chhawm chhuak a. Spy hna thawkin kawng lakah hloh palh awih a ni lo. Biakin bul zunin bulah battalion chanve dawn hian lo nghakin, inkhawm bana zuk leh tur hisapa a liah hlum, Biakin hungna pal bana a tar va mai chu rang mai khengin kan han craise praise (a awmzia ka hre bik law) ta mai thin kha a ni a. Khang lai khan kan lo taima lehling zawkin a va lunglenthlak si em!

Sipai huai:
Rambuai rah chhuah zinga langsar ber pawl chu sipai hlauhna kha a ni awm e. Naupang tap thlemna ber kha a ni a. Tih, Hlauh, thawn leh ngaihsan kan fawm a. Nia, sipai an ni tlat, vai tawng in an la tawng zui bawk si. Kan zawh tawk a tlem awm tehlul nen Sipai puak phurh kha kan hlau em a sin. Pa, Block president neih ai chuan Sipai patrol lo be ding thei pa neih kha a thlanawm fe zawk. Eng anga tap tui lai pawh niin, kan tah chhan kha tha-in nawrhpui tlak khawpa thu tling pawh ni teh reng mah se,”Chu sipai” an tih tawh kha chuan inhnit hlawp hlawp chung pawhin fullstop hram kha tihmakmawh ka chunga lo tla a ni tlat. Hnawksak an ti ru ngawih ngawih tih hre ta lo chuan, an silai mawlh mai kha kan hlauva, naupang tap kap pawp mai duh hmel khan kan hmu tlat a lawm. Sipai di phur, Biri zu paha chawl hahdam mai mai pawh bang awng atangin kan bih dek dek ngam chauhva. An kal liam hnu lahin Vai rim hnim tur in team khat daih awm vel hian kan bawr nghal laih zel kha a ni a. khati taka Sipai kan lo hlau kha a lo va atthlakin a va lunglengthlak si em!

Zan pawnto:
Khai, khang hun nuam leh hlimawm lutuk kha sawi hmaih phal chi rual an ni lo. Infiamna chi hrang hrangin kan infiam a. ‘Sakei bu ka luah, a bu lum lai ka luah ka luah’ tiin chhun enga kan kawm thin kan thiante tho hlau khan baklengin kan tlan chhiaa. A ruata kan ruat Saikalak-misuala ngei mai hlau khan kawng awm chhung zawng kan tlan chhia a, na chang hria ni ila Tipaimuk road ah kan tlan duh hial awm e. Kawngin daih tawh hek suh. Pu Langa kawm karah tlan lutin, Vawkpui no nei hlim bu tak mai kan han tawn darh. Nguk nguk tiin min lo ter thei bik der silo, chhuah leh dawn lahin chuan Saikalaka kan hlau si. Tapchhak zawn kil lamah zawi muangin kan han bawkvak chho, vaivut kara uihlii’n a rang arangin khuangchawi thla emaw tiin kut sa ruai ah min lo hmang zui. Pu Langa fanu Ku Heri inleng hovin thingpui in bangin min rawn Baptis rawl nen. A sat thu sawi ngam a ni lo. Zawimuangin kawmchar lam tawlhpheiin, Pu Langa nupui, Pi Nemi`n a tunu Chemi zun a thlit lai tak mai nangching in min han ordain leh thlap. Hlau chung chunga At-hlo-hling te chu pal phei zelin thingkhawnah kan han lawn liama, Thla lah chuan min rawn melh kuau chungin chhum karah a lut tak zut zuta. Thiante kan han pawh leh meuh chuan lenghawn ar a khuang ta raih mai. ‘Tin dial e’ tia kut insuihzawmin, a tlak tlak vanduai turin vaivut kan la vawr zui. Mahni inlam theuhah tlan hawngin hlauhna bawihin min zem tan. Sumhmun thim paltlang turin sakruangah laitha a zam mawlh lo. Hla de daw atanga “Nu” tiin vawi thum el euh kan au lauh lauh hnu chuan Laltin ung tawh tak, Sermon na a ka lo khai thin ngei mai nen chuan ka Cindy chu a lo chhuak. Thlamuang awm takin a thlawhin kan han thlawk luta. Hmabak ko tak hmachhawn tur a la awm cheu. Ke sil lova mut phalloh tih chu Kumpinu thuchhuak aiin a rorum zawk. Hmanhmawh takin ke hmawr chu a bal cho chhuak tawkin kan han tleuh puat a. Tapchhakah Chhemthei rah chhana tuibur hmuamda awm vel kan in hem hnu chuan ka pawnto na suit nen chuan pawnpui kar ah kan in thawlh lut leh ta nge nge. Kha tiang zan, uihli vanga kei leh ka chhungte erawh in mutmu kan hmuh mang loh laite kha a lo va ngaihawmin a va lunglenthlak si em!

A sen chi te nen:
Heta a sen chi kan tih hi chuan kohhran sadai a thiat lova, VDP mit a ti mim hek lo. Pate ram kalin Theikhuangthlup ( Thei chhungsen kan tih mai) min rawn hawn changa thiante zingah ei bik nih lantir duh avanga hmui-hmai leh kut ilo vel han sen nalh theih dan te kha. A chhip seh hawngin thian duhsak zawng deuhte vawi hnih-khat kan han liah tir zuaia, a hang zual bik a sin aw. Sawhdawnga Theihmu rah hmin han sawha duh tawk maia a sawh-fung kan han in peh zut tawm laih laih maite khan a tuina a ti nep chuanglo mai nilovin kamsirah beng thleng rawka a sen phei ruah mai te khan nun a ti hlim zual thin. Kuhva ei chakawmna ber chu a sen bawk kha a nih avangin U-te in lengin kuhva phel min khilai zauh changte khan chil kha kan chhak zingin a rawng kha a mawi zual thin. Manlo va sen theihdan tha ber chu Fahpawl leh Hnahkiah pil khawr pawlh kha a ni tih kan chian em avangin Bekang-um-hnah te chu khawdaiah te hian kan hual fur thina, a kung rek nguk khawpin kan thel awllo. Nu le pate’n “Rulhut pai a awl” an tih avang erawh chuan duhthusamin a tui chu kan lem ngai lova, kan pik sen zuai zuai thin. Chungte avanga thei ta riauva kan in hriat laite kha a lo va atthlakin a va lunglenthlak si em !